Scho gli ischäs losgangä u mir si mitäm Zug uf Zäziwil bummlät, dert hets zersch mau äs Kafi-Fertig gä, när heimär ä lengärä Fuäsmarsch Richtig himuwärds aträtä. Däm Ufstiig hei di erschtä scho müässä tribut zollä, uf jedä Fau het d Spitzägruppä doch einigi Zyt müässä wartä ar Ziuakunft.

Dert simär inä Chäsi u hei, zämä mitäm Meischter persönläch, ä eigätä Chäs chönnä machä. 4 KG schwär isch das Ding wordä, gspickt mit feinä Hanfsamä, so dasmär am Schluss ä wunderbarä Hanf-Raclette-Chäs hei gha!

Die meischtä vo üs heisäch aus wahri Chäser usägschteut, vor auäm de bim probierä u säubär choufä nach getaner Arbeit.

Anschliessend simär inä dunkli Grottä vom Hotel Appäberg, wos plötzläch chlopfät het ar Tür. Dar Samichlous het säch de doch no d Ehr gä bi üs. Är isch zwar chli ä spezieuä gsi. Wahrschiinläch ä Kolleg vom Luki, aber är het di Gschänkli ömu hurtihurti übergä.

Nach dä vilä grossä Überraschigä u fröhlächä Gsichter heimär de disloziert ids Grottä-Resturant vom Hotel wo mir im töifschtä Stollä hei äs grifigs Fondue zu üs gno.

Dä chäsig Tag isch auäs angerä aus stinkig gsi u mir hei doch aui äs schöns Gschänkli mit hei chönnä näh!

Stef