2. Dezember 2000

Bim erste Gourmet-Alass im Dezämber 2000 hei mir üs im Eurasia kulinarisch la verwöhne. Wie dr Name scho seit, isch d Spezialität vom Huus ä Mischig zwüsche europäischer und asiatischer Chuchi. Die leckeri Mischig wird ou konsequänt bim Personal düregsetzt - nätti Frölein us Asie aber ou es bsunders ufmerksams Chätzli usem Wallis hei üs Bedient :-)

Ä rächte Ökognom geit nid ohni Cravatte u Azug i Kursaal, drum hei mir üs ou in Schale Gworfe, um däm Gourmet-Alass dr nötig stilvoll Rahme ds verleihe.

	Die Qual der Wahl. Es het so viel leckeri Sache, was wei mir bstelle?
Üsi Erwartige si meh als nume erfüllt worde - scho bir Vorspies hei mir gstunet und gschlemmet!

Das mir ou no es Glesi gno hei müsst me ja eigetlech nid säge :-) Mir si ou bir Uswahl vom Wy SEHR grosszügig gsi - keis Wunder si au so zfriede am grinse!

Zu de exotische Gricht hets de ou no exotischi Kläng gä!

Nach em ne herrleche eurasische Nachtässe hei mir üs de no em Gnuss vo Tabak häre gä.

Bevor mir üs ids Nachtläbe gstürzt hei, isch no dr Fototermin ufem Programm gstande. D Gnome hei sech in Pose gworfe und si mir ehrlech, we de die Giele nid jung, dynamisch und erfolgrich si, wär de? ;-))))

We me die Fötteli gseht würd mes fasch nid gloube aber de Gnome isch es glich nid so wohl gsi im Business Outfit - emu d Mehrheit het lieber nid eso gstylet id Stadt wöue. Drum si mir de grad im Kursaal blibe und si no ids Roulette ga tanze. I däm Schuppe het sech e bsunders Bunti Gsellschaft tummlet, einersits verzwifleti Single Froue, wo me scho ufe erst Blick gseh het, warum si no single si und in Lauerstellung jungi Manne, wo gärn wei hürate. Mir hei üs de ou dämentsprächend bestens amüsiert, guet dass üsi Kommentär niemer het verstande!

So isch dä Abe bi es paar Drinks und grifige Sprüch ds Änd gange. Mit em erste Gourmet-Alass hei mir d Mässlatte für witeri Schlemmer-Events scho mau zünftig höch gsetzt! Merci Steffu, für dä super Abe!

Hadi