Da üsä erscht Iwent, dr Surpriser grad id Hosä isch - besser gseit het müässä abgseit wärdä - heimär üsä erscht offiziell Event-Termin, abgseh vor HV (wo ja aber äbä nid aus Iwent giut - logisch...), uf dr Aare wöuä verbringä. Dr Sharki-Mark het säch zur Verfüigig gschteugt gha, das ganzä z'orgnisierä u het das o glänzend gmacht (äs grossäs Merci a derä Schteu)!

Dr Termin isch zwar, churz vor dä Prüäfigä, ä chli blöd abgsetzt gsi, trotzdäm hei aui dä Tag guät implanät gha u säch diä paar freiä Stung freiglehrt. Wo mir üs gägdi gnädige Eufä bim Träffpunkt HB Bern hei versammlät isch dr Pierre-the-share nid wiä abgmacht erschinä. So si mir haut (mit Tränä i dä Ougä) ohni ihn abgfahrä u hei de ersch när, nach öppä zwänzg Telefon usägfungä, was mit däm Kärli los isch. D'Gründ für sis Niderschiinä si jedefaus ilüchtend gsi, u är het versprochä, gägä Abä no im Eichouz, üsäm Endziuu. z'erschiinä.

Z'Thun acho hei mer zersch mau mächtig ikouft, damit mir nid hei müässä Durscht odär Hungär ha während dr Fahrt. Nächär simir, mit öppä je 20 Kilo am Ranzä oder Rüggä zum Startpunkt gschlirgät. Leidär het scho bim ufpumpä eis vo üsnä 5 Boot afä lüftelä, u so heimär scho grad die erschti Entsorgig müässä machä. Usäm afänglich risigä Platzagebot isch de schliessläch langsam ä Gmörlifährlätä wordä. Uf jede Fau isch äs nid eifach gsi, aui Lüt u vor auem di richtigä Getränk o richtig z'platziere. Schliesslich heimär diä richtigi Platzordnig aber de dochno chönnä versugampflerä: d'2er-Teams Bumäbear - Otter, "Ha Dornä (im Finger)" - Payé und Vallo-Tonne (Steigerig vo Giga...) - Zucker si mit äm nä Soloräidär, nämläch äm Sharki-Mark ergänzt wordä.

Bis zur Isäbahnbrügg isch de oni auzufiu los gsi, abgseh vo viu glir u grossäm Gschnur. Diä meischtä Aare-Fährler si scho viu früächär losgfahrä gsi, so das mir grad hei chönnä gradäwäs dürächarwipflä. Gägä d'Risäwäuä zuä heimär de aber langsam müässä Gfächtsstationä beziäh u die richtigä Positionä iinäh. Aus einzigi wahri Wasserkünschtler het sech de ds Duo Vallo-Tonne - Zucker zeigt. Di zwe, wo scho im früächä Autär hei im Wasser gfidelet, hei aus einzigi grad chönnä düräziäh u ohni uszschtigä (wägäm Rücklauf) witärfahrä. Leider het das Mannovär si Priis gchoschtät u disi zwe hei müässä ahautä um ds Boot, wo dür diä mächtige Gwautä het nachägla, neu ufpumpä. So isch dä Vorschprung widär verlorä gsi u ersch aus letschti hei eini zwe zum Zmittag adockt.

Bim Zmittag isch abgseh vo rä schwulä Ha Dorn (im Finger)-Wurscht eigentläch nid viu losgsi. Auäs het riläxt, chrümösälät u het gsapperlötärlät bis zum umfauä. Natürläch het mä o Chraft u Flüssigs tankt für die räschtlichi Fahrt. Bim iwassärä het de när ono am Sharki-Mark sie Porsche lagaa u so heimär die zwöiti Heufti mit drü Boot müässä i Agriff näh. Doch trotz däm Platzmangu heimär die drü Boot souverän ids Eichholz manofüsioniert. Nach langer Solo-Flucht hed säch ds Duo Vallo-Tonne - Zucker de scho widär müässä/wöuä la iholä, so das mär zämä hei chönnä ifahre ar Costa Eicholz.

Churz nach üs isch de ono, ändläch, dr Pierre itroffä u het dä supär Tag no abgrundät mit sirä Präsänz.

Usärä dürfeschtätä Nacht isch de auerdings nüt me wordä, nachem Boot tröchnä, packä u unkonventionellä Brätlä si aui sehr müäd, verhünzerlet u verschrümpferlät gsi u hei liäbär wöuä dr Heimwäg aträtä. Vor auem dr Sharki-Mark het nid chönnä mit dä wiblächä Hardcore-Kifferinne mithautä u isch glad uf Platz ipfuset.

Aus i auäm ä glungnä Ischtand vom VMÖ-Tiim. Näbäm priv Schnurä u Suufä, hei mir üs jedefauss geischtig (bim schnurä, oder o diskutierä gnennt) u körperlich (luäg uf Aschnitt 4) agschträngt u chöi üs sodermitt klar vomänä Suufgelage und -Verein klar dischtanzierä.